संजय शिंदे
जिल्हा प्रतिनिधी पुणे
संत श्री तुकाराम महाराज पालखी मार्गा (राष्ट्रीय महामार्ग 965 जी ) ची आपण स्वतः येऊन पाहणी करून आढावा घ्यावा, अशी विनंती केंद्रीय रस्ते, परिवहन व महामार्ग मंत्री नितीन गडकरी यांना नागपूर येथे भेटीत आज शनिवारी (दि. 28) केली. त्यास तात्काळ होकार देत ना.नितीन गडकरी हे पुढील महिन्यामध्ये दि. 10 एप्रिल रोजी संत तुकाराम महाराज पालखी मार्गाची पाहणी करणेसाठी येणार आहेत, अशी माहिती माजी मंत्री हर्षवर्धन पाटील यांनी दिली.नागपूर येथे ना.नितीन गडकरी यांची हर्षवर्धन पाटील यांनी भेट घेऊन संत तुकाराम महाराज पालखी मार्गाच्या अपूर्ण व व निकृष्ट कामांबद्दल चर्चा केली. यावेळी हर्षवर्धन पाटील यांनी नितीन गडकरी यांचेकडे पालखी मार्गावरील ठिकठिकाणीचे उड्डाणपूल, भुयारी मार्ग, बाह्य वळण मार्ग, इंदापूर ते माळीनगर पालखी मार्ग रस्ता यांची कामे तातडीने पूर्ण करण्याची मागणी केली.देहू ते पंढरपूर पालखी मार्गावरील जंक्शन उड्डालपूल, गोतोंडी उड्डाणपूल, निमगाव केतकी बायपास, वडापुरी उड्डाणपूल, वकीलवस्ती भुयारी मार्ग, बावडा बाह्यवळण रस्ता ही अपूर्ण कामे तातडीने पूर्ण करणे तसेच इस्टिमेट प्रमाणे वृक्षारोपण, झाडे, रस्ता दुभाजकांची कामे, स्ट्रीट लाईट, दिशादर्शक फलक आदी कामे ठीकठिकाणी झालेली नाहीत. तसेच अनेक ठिकाणी गटारीची कामे झालेली नसल्याने अथवा अपूर्ण असल्याने नागरिकांना त्रासाला सामोरे जावे लागत आहे. सदर कामे इस्टिमेट प्रमाणे कामे पूर्ण करण्यात यावीत तसेच कामे अपूर्ण असताना सुरू असलेली टोल वसुली आदी अनेक विषयांवर यावेळी हर्षवर्धन पाटील यांची नितीन गडकरी यांचेशी चर्चा झाली. यावेळी ना.नितीन गडकरी यांनी राष्ट्रीय महामार्ग प्राधिकरणाच्या संबंधित अधिकाऱ्यांना फोन करून पालखी मार्गाची कामे तातडीने पूर्ण करणे संदर्भात आदेश दिले तसेच कामे अपूर्ण असताना टोल कसा काय लावला या संदर्भातही अधिकाऱ्यांकडे विचारणा केली. दरम्यान, या भेटीत नितीन गडकरी यांचेशी हर्षवर्धन पाटील यांची इथेनॉल यासंदर्भातही चर्चा झाली.
