त्रिफुल ढेवले ग्रामीण प्रतिनिधि मोर्शी
मोर्शी : वृद्ध महिला व दिव्यांग व्यक्तीच्या घराजवळ शेणखताचा उकिरडा आणि टीनपत्रे लावून अतिक्रमण केले जात आहे. त्याच्या निषेधार्थ येथील नगर परिषद कार्यालयासमोर सागर पाटील यांनी अन्नत्याग आंदोलन सुरू केले आहे. अतिक्रमण काढेपर्यंत हे उपोषण सुरू राहणार अशी भूमिका त्यांनी घेतली आहे.शहरातील रामजीबाबा मंदिरालगत वॉर्ड क्रमांक ३ येथे किशोर प्रकाश पाटील व त्यांची वृद्ध आई ललिता पाटील हे दोघे स्वतःच्या घरात राहतात. त्यांच्या घराशेजारी सर्व्हिस लेनचा रस्ता आहे. परंतु २०१९ पासून या रस्त्यावर विजय गोहाड व सुखदेव वानखडे यांनी शेणखताचा उकिरडा व टीनपत्रे लावून तो रस्ता बळजबरीने ताब्यात घेऊन त्या ठिकाणी पक्क्या स्वरूपाचे बांधकाम सुरू केल्याचे उपोषणकर्त्यांचे म्हणणे आहे. रस्ता बंद केल्याने जाण्या-येण्यास अडथळा निर्माण झाला आहे. शिवाय जाण्या येण्याच्या रस्त्यावरच शेणाचा उकिरडा टाकल्यामुळे त्या ठिकाणी मोठ्या प्रमाणात घाणीचे साम्राज्य पसरले असून विविध आजारांना त्यांना सामोरे जावे लागत आहे.किशोर पाटील हे दिव्यांग असून त्यांना केवळ वृद्ध आई आहे. त्यांच्या नावाने पंतप्रधान आवास योजनेचे घरकुल मंजूर झाले असून, त्यांना बांधकाम करण्याकरिता अडचण निर्माण झाली आहे. या गंभीर प्रकरणी किशोर पाटील यांनी पालकमंत्री तसेच नगरविकास मंत्रालयाकडेही तक्रार दाखल केली आहे. येथील मुख्याधिकारी यांनासुद्धा वारंवार कळवण्यात आले. परंतु प्रशासनाच्या वतीने कोणत्याही प्रकारची ठोस कारवाई न झाल्यामुळे त्यांचे भाऊ सागर पाटील यांनी नगर परिषद कार्यालयासमोर उपोषणाला सुरुवात केली आहे.
