स्व.गणपतराव इंगळे कृषी, उद्यानविद्या व अभियांत्रिकी महाविद्यालयात संविधान गौरव सोहळा संपन्न
गोपाळकुमार कळसकर तालुका प्रतिनिधी, भुसावळ
भुसावळ : डॉ.पंजाबराव देशमुख कृषी विद्यापीठ, अकोला संलग्नित तथा सातपुडा शिक्षण संस्था, जळगाव जामोद संचालित स्वातंत्र्यवीर गणपतराव इंगळे कृषी, उद्यानविद्या आणि अभियांत्रिकी महाविद्यालयामध्ये २६ नोव्हेंबर रोजी ‘संविधान दिवस’ अत्यंत उत्साहात साजरा करण्यात आला. महाविद्यालयाच्या राष्ट्रीय सेवा योजना (एन एस एस)पथकाने या कार्यक्रमाचे आयोजन केले होते. भारतीय संविधानाचे महत्त्व, उद्देशिका आणि नागरिकांचे अधिकार व कर्तव्ये यावर प्रकाश टाकण्यासाठी हा कार्यक्रम आयोजित करण्यात आला होता. सदर कार्यक्रमामध्ये प्रमुख मार्गदर्शक म्हणून डॉ.नितीन घोपे यांनी विद्यार्थ्यांना संविधानाचे महत्त्व, भारतीय लोकशाहीतील त्याचे स्थान आणि प्रत्येक नागरिकाच्या जीवनातील भूमिका याबद्दल सखोल मार्गदर्शन केले. महाविद्यालयाचे प्राचार्य प्रा.योगेश गवई त्यांनी आपल्या अध्यक्षीय भाषणात विद्यार्थ्यांना संविधान मूल्यांचे पालन करण्याचे आणि एक जबाबदार नागरिक बनण्याचे आवाहन केले. यावेळी राष्ट्रीय सेवा योजना कार्यक्रम अधिकारी तसेच महाविद्यालयातील सर्व शिक्षक व शिक्षकेत्तर कर्मचारी उपस्थित होते. कार्यक्रमाच्या समारोपात उपस्थितांनी संविधानाची उद्देशिका वाचून संविधानातील मूल्यांचे जतन करण्याची शपथ घेतली. हा कार्यक्रम विद्यार्थ्यांमध्ये संविधान साक्षरता आणि राष्ट्रीय एकात्मतेची भावना वाढवणारा ठरला.











