शेती हडप करण्याचा कंपनीचा उघड डाव
मारोती बारसागडे
जिल्हा प्रतिनिधी गडचिरोली
गडचिरोली/जिल्यातील चामोर्शी तालुक्यातील कोणसरी येथे लायड्स मेटल कंपनीचे काम सुरू असून कंपनीने गावात हुकूमशाही कारभार सुरु केला आहे. शेतकऱ्यांच्या पिढीजात जमिनीवर डोळा ठेवून बळजबरीने व दडपशाहीचे घाणेरडे डावपेच सुरू करून शासन आणि प्रशासनाचा आधार घेत कंपनीने थेट शेतकऱ्यांची शेती हडप करण्याची मोहीम राबवित असल्याचा आरोप ग्रामस्थांनी पत्रकार परिषदेत केला असून कोणसरी परिसरात प्रचंड रोष उसळला आहे.
ग्रामस्थांचे ग्रामस्थांच्या म्हणण्यानुसार कंपनीचे दलाल, अधिकारी व सरकारी ताफा घेऊन थेट शेतीच्या सीमेत घुसून मोजणीचे करण्याचा सपाटा सुरू केला आहे. फॉर्म-C चा दबाव, कागदपत्रांचा अवमान, आणि मालकांना गुन्हेगार ठरविण्याची उघडी धमकी यामुळे गावकरी संतप्त झाले आहेत. शेतकऱ्यांच्या हातातील पिढीजात जमीन हिरावण्यासाठी कंपनीचे नियोजनबद्ध ऑपरेशन सुरु केले असून, शेती दे नाहीतर कारवाईला सामोरे जा अशी धमकी देत असल्याचे ग्रामस्थानी सांगितले आहे. आमची शेती आम्ही देणार नाही कंपनीचा एकही फावडा जमिनीत घुसू देणार नाही गरज पडली तर रस्त्यावर उतरू असा इशारा ग्रामस्थानी दिला आहे. काही शेतकऱ्यांनी न्यायालयात याचिका दाखल केली असतानाही कंपनी व प्रशासनाने न्यायप्रविष्ट प्रकरणात उडी घेत कायद्याचा उघड दुरुपयोग केल्याचाही आरोप ग्रामस्थांनी केला. स्थानिकांचे असे म्हणणे आहे की, कंपनीला जमीन मिळावी म्हणून विभागीय पातळीवरून सर्व यंत्रणा हलविली जात आहे. गावकऱ्यांना न विचारताच जबरदस्तीने कागदपत्रे तयार करणे, जागेवर तपासणीचे नाटक करणे, आणि ग्रामस्थांवर दबाव आणणे हे प्रकार सुरूच आहेत. दरम्यान ग्रामस्थांनी मोठे आंदोलन छेडण्याची तयारी सुरू केली असून, लायड्स मेटल कंपनीची दादागिरी लक्करच मोडून काढणार असा कडक इशारा ग्रामस्थानी दिला आहे.
पत्रकार परिषदेला गणेश कोटरंगे, विकास मोहुर्ले , सोनू कावळे, कुशाब गोडबोले, अभय गद्दे, रोहन मडावी, दशरथ करपते, आनंदराव मडावी, भाऊजी कावळे, सुरेश करपते व इतर ग्रामस्थ उपस्थित होते.
