महेश निमसटकर
तालुका प्रतिनिधि भद्रावती
भद्रावती : श्री. गुरुदेव सेवा मंडळाचे अध्वर्यू स्व. जगन्नाथराव गावंडे यांचा द्वितीय स्मृतीदिन विविध उपक्रमांनी नुकताच साजरा करण्यात आला.यावेळी सामुदायिक ध्यान, प्रार्थना, रामधुन, स्वच्छता अभियान व श्रध्दांजली आदी कार्यक्रम अत्यंत भावपूर्ण वातावरणात सुरक्षा नगर येथिल प्रार्थना मंदिरात आयोजित करण्यात आले. अखिल भारतीय श्री गुरुदेव सेवा मंडळाचे जीवन प्रचारक तसेच भद्रावती येथिल जेष्ठ सामाजिक कार्यकर्ते स्व. जगन्नाथजी गावंडे यांच्या द्वितीय स्मृतिदिन कार्यक्रमाची सुरुवात सकाळी सामुदायिक ध्यानाने झाली. त्यानंतर परिसरातून रामधुन काढण्यात आली. त्यामध्ये स्वच्छता अभियान राबवित परिसरातील नागरीकांनी आपापल्या घरासमोर स्वच्छता करीत घरासमोर रांगोळी व महापुरुषांचे फोटो ठेवुन मार्ग सुशोभित करण्यात आले. रामधुन प्रसंगी बाबारावजी नागोसे यांचे अध्यक्षतेखाली वासुदेवजी सुकारे यांचे प्रमुख उपस्थितीत सुवर्णाताई पिंपळकर व साै. शुभांगीताई कुत्तरमारे यांनी मार्गदर्शन केले. सायंकाळी भावपूर्ण श्रध्दांजली कार्यक्रमाची सुरुवात सामुदायिक प्रार्थनेने करण्यात आली व त्यानंतर अनेक मान्यवरांनी आपले मनोगतामध्ये स्व. जगन्नाथजी गावंडे यांच्या जीवनकार्यावर प्रकाश टाकत आपल्या आठवणींना उजाळा दिला. याप्रसंगी केशवानंद मेश्राम महाराज, चंद्रकांतजी गुंडावार, बालाजी नागपूरे, गोपालराव ठेंगणे, . उर्मिला बोंडे, रमेश काळे, अमित गुंडावार, उषाताई आखाडे, रामकृष्ण कुबडे यांनी आपले मनोगत व्यक्त केले. त्यानंतर स्व. जगन्नाथजी गावंंडे यांचे स्मृती प्रित्यर्थ गावंडे परिवाराचे वतीने बालसुसंस्कार शिबीर शाश्वत योजने करीता ५० हजार रुपयाचा धनादेश मंडळाकडे सुपुर्द करण्यात आला. तसेच याप्रसंगी बाल सुसंस्कार शिबीर शाश्वत योजनेत मधुकररावजी धाबेकर यांनीसुद्धा १० हजार रुपयाचा संकल्प केला. शेवटच्या मौन श्रध्दांजली कार्यक्रमाची सुरुवात ‘गुरुदेव हमारा प्यारा’ या संकल्पगीताने होऊन ‘विधाता मृत्यु हो ऐसी’ या राष्ट्रसंतांच्या भजनाने स्वरांजली अर्पण करण्यात आली. त्यानंतर सर्व उपस्थितांनी काही वेळ मौन पाळत श्रध्दांजली अर्पण केली. आरती व राष्ट्रवंदनेने कार्यक्रमाची सांगता करण्यात आली. कार्यक्रमाचे संचालन गुणवंतदादा भद्रावतीकर यांनी केले,तर आभार विशाल गावंडे यांनी मानले.
![](https://i0.wp.com/adhikarnama.in/wp-content/uploads/2021/07/41795f06-911f-4a48-906f-66953021f824.jpg?fit=1080%2C1080&ssl=1)
![](https://i0.wp.com/adhikarnama.in/wp-content/uploads/2021/07/41795f06-911f-4a48-906f-66953021f824.jpg?fit=1080%2C1080&ssl=1)