महेश निमसटकर
तालुका प्रतिनिधि भद्रावती
भद्रावती : खेळाडूंसाठी असलेले क्रीडांगण शारीरिक विकासाचे केंद्र व्हावे, असे प्रतिपादन वरोरा-भद्रावती विधानसभा क्षेत्राच्या आमदार प्रतिभा धानोरकर यांनी येथील तालुका क्रीडा संकुलातील बहुउद्देशीय सभागृह व खेळाडूंसाठी करण्यात आलेल्या पिण्याच्या पाण्याच्या व्यवस्थेच्या लोकार्पण सोहळ्याप्रसंगी केले. यावेळी नगराध्यक्ष अनिल धानोरकर, तहसीलदार अनिकेत सोनवणे, ठाणेदार गोपाल भारती, मुख्याधिकारी सूर्यकांत पिदुरकर, गटविकास अधिकारी डॉ.मंगेश आरेवार, जिल्हा क्रीडा अधिकारी अविनाश पुंड, उपविभागीय अभियंता आर. आर. मत्ते, ज्येष्ठ क्रीडा संघटक डॉ. बी. प्रेमचंद, महासचिव डॉ. राकेश तिवारी, तालुका क्रीडा संकुल समिती सदस्य सचिव विजय डोबाळे आदी मान्यवर मंचावर उपस्थित होते.आ.धानोरकर पुढे म्हणाल्या की, देशाला जागतिक स्तरावर कणखर बनविण्यासाठी शालेय शिक्षणाबरोबर कौशल्य विकास शिक्षणासोबत क्रीडा क्षेत्राच्या माध्यमातून त्यांचा शारीरिक विकास करणे गरजेचे आहे. शालेय वयात मुलांना पुस्तकी ज्ञानाबरोबरच शारीरिक विकास साधने अत्यंत गरजेचे असून कोरोना काळात मुले अधिक काळ घरात राहिल्यामुळे त्यांच्या मानसिकतेवर व शारीरिक विकासावर ताण निर्माण झालेला आहे. शाळा चालू झाल्यानंतर हा ताण कमी करण्यासाठी शिक्षकांनी अथक परिश्रम घेणे गरजेचे असून विद्यार्थ्यांना अभ्यासाबरोबर जास्तीत जास्त क्रीडांगण उपलब्ध करून देणे व त्यातून त्यांची शारीरिक क्षमता वाढविणे महत्त्वाचे राहील. वरोरा-भद्रावती विधानसभेत महिला आमदार म्हणून मी काम करीत आहे. या भागातील महिला सर्वच क्षेत्रात अव्वल ठराव्यात. याकरिता महिलांनी पुढे यावे असे आवाहनही त्यांनी केले. या भागातील महिलांना येणाऱ्या समस्या मार्गी लावण्यासाठी आपण कटिबद्ध असल्याचेही त्यांनी यावेळी सांगितले. यावेळी अन्य मान्यवरांनी देखील आपली मते व्यक्त केली.
