आमदार प्रतिभा धानोरकर यांची गृहमंत्री दिलीप वळसे पाटील यांच्याकडे मागणी
महेश निमसटकर
तालुका प्रतिनिधि भद्रावती
भद्रावती,दि.८:-भद्रावती तालुक्यातील सुमठाना-तेलवासा मार्गावरील गवराळा शेतशिवारात ४ एप्रिल रोजी एका २२ वर्षीय तरुणीची नृशंस हत्या करुन तिचा मृतदेह नग्नावस्थेत फेकण्यात आला.या प्रकरणाची वरोरा-भद्रावती विधानसभा क्षेत्राच्या आमदार प्रतिभा धानोरकर यांनी गंभीर दखल घेतली असून त्यांनी राज्याचे गृहमंत्री दिलीप वळसे-पाटील यांच्याकडे सखोल चौकशीची मागणी केली आहे. अद्याप या तरुणीची ओळख पटली नसून नराधम आरोपींना शोधण्यात पोलीस यंत्रणेला यश आले नाही. चंद्रपूर जिल्हा हा शांत कायदा व सुव्यवस्था अबाधित असलेला जिल्हा म्हणून ओळखला जातो. परंतु गवराळा येथील घटना जिल्ह्यातील महिलांच्या सुरक्षेचा प्रश्न निर्माण करणारी आहे. जिल्ह्यातील पोलीस यंत्रणेला दोन दिवस लोटून देखील नराधम आरोपीला अटक व त्या युवतीची ओळख पटविण्यात यश आले नाही. ही बाब गंभीर आहे. या गंभीर गुन्ह्यात आरोपी नराधमाला तात्काळ अटक झाल्यास या गंभीर गुन्ह्यातील मृत युवतीची ओळख पटणार आहे. पुढे देखील अशा घटना टाळण्यासाठी या आरोपीला तात्काळ अटक होणे गरजेचे आहे. त्यामुळे या प्रकरणाची उच्चस्तरीय चौकशी करण्याची मागणी आमदार प्रतिभा धानोरकर यांनी गृहमंत्री दिलीप वळसे पाटील यांच्याकडे केली आहे.
